Ja hérna..

Það er ekkert smávegis sem gengið hefur á undanfarna daga hjá ráðamönnum höfuðborgarinnar.

Maður er svo gott sem orðlaus yfir því gerræði sem virðist vera meira og minna við lýði á öllum vígstöðvum. Sem betur fer eru þó einhverjir sem spyrna við fótum og reyna að hefta framgang spillingar og siðleysis sem virðist vera í algleymingi í þjóðfélagi voru hvert sem litið er um þessar mundir. 

Veit ekki hvernig í ósköpunum maður fer að því að komast að einhverjum sannleika í þessu máli og mér sýnast nú ansi margir standa frammi fyrir þeim vanda. Hugtökin ,,"réttlæti" og ,,sanngirni" virðast svífa einhversstaðar í lausu lofti, þó margir reyni vissulega að halda þeim innan ramma mannlífsins. Það verður þó sífellt erfiðara, get ég ímyndað mér, í þessum veruleika taumlausrar peningahyggju og útrásarófreskjunnar sem sífellt taka á sig nýjar myndir.

En maður getur víst ekki annað en vonað að einhverskonar jafnvægi sé í sjónmáli og hlutirnir færist til betri vegar. 

 

 

 

Að loknum alþjóðlegum geðheilbrigðisdegi

Ja góðan daginn!

Hér er sem sagt fyrsta færslan á þessari bloggsíðu.

Eina ferðina enn er undirrituð á vappi um miðja nótt. Raunar er hún meira en ,,á vappi" því á þessum tíma sólarhrings er hún alltaf hressust og finnst því upplagt að gera ýmis húsverk sem setið hafa á hakanum, þvo gluggana, laga til í skúffum, skúra, hengja upp og brjóta saman þvott, þvo klósettin og svona má lengi telja. Meira að segja hefur hún oftar en einu sinni eldað mat fyrir næsta dag eða  bakað köku.

Já, maður er víst meira en lítið undarlegur og á skjön við allt og alla. 

 Ég þarf til dæmis að fara snemma á fætur á morgun og einsetti mér að fara ekki seint að sofa.

En hvað skeður? Þegar komið er fram yfir miðnætti er eins og heilasellurnar vakni af dvala. Ótal hugmyndir skjóta upp kollinum og lífið virðist bjart og skemmtilegt. Það er nefnilega það. Þá tímir maður ekki að fara að sofa. Loksins eðileg, get hugsað og framkvæmt ýmislegt, en framkvæmdagleðinni  eru skorður settar, þar sem nóttin ríkir í mannheimum og þá hvílast venjulegir menn. Hafa fullan rétt á því. Svoleiðis á maður að vera.

Þetta virðist óleysanlegt ,,vandamál" úbbs! Það flaug FLUGA upp í nefið á mér! 

Aha. skrifa meira síðar.